समय को फेरा

समय को फेरा

( बोलो पोवारी , बाचो पोवारी , लिखो पोवारी )

" देखो , जमानो केतरो बदल गयेव."

असो एक बुजरूक अादमी आपल् बुजरूक संगीला असो कवतान् आपन देखजन , पर आता येव जमानो एतरो जोरलक परायरयीसे का आमर् सारक् जवान माणूसलाबी वर्‍यासारको कवनो पळसे. रोजक् रोज जमानो बळ्  तेजीलक बदलत रयेलक पयले तीस च्यालीस सालमा एकान चीज बदलशान नवी चीज देखनला मिल्. आतात् अजकी चीज मयनाभरमाच पूरानी होयजासे. जसो अजको पेपर सकारी पुरानो होयजासे यतरो तेजीलक जमानो बदल रयीसे.

आता आपल् घरक् टिवीकोच देखोना , एक जमानो असो होतो का गावमा एक दुयच कारी - पांडरी टिवी रवत अना वय देखनला पूरो गाव एकजाग् आपला कामधंदा सोळशान जमा होय. कार् पांडर् टिवीक् बाद कलर टिवी आवनला थोळो जमानो लगेव. पर आता घरघरमा कलर टिवी आयी. वोक्ंलक बत्तीस इंचीकी एल. इ. डी. टिवी देखनला बेठारका दुयच्यार लोकबी नयी आवत. पयले टिवीवालो घर् सनवार् ईतवार् यात्रा भर् . टिवीवालोघरकी सपरी दुयदिवस सरायी नोहती रवत. आता बुलायशानबी कोणी टिवी देखन घर् नयी आव्.

आमर् गावमा जब् टिवीको आगमन भयेव तब् आमी दुय च्यार सालका रया रवज्. तब् टिवीवालं घर् जत्रा भर्. टिवीवाल् कायी घरका लोक टिवी देखनला आवनेवालंयीनला टिवी देखनक् बदला घरका कामधंदाबी लगावत. पर समय मोटो बलवान से. जेन् घर् टिवी देखनला सनवार ईतवार यात्रा भर् वोन् घरमा आता बसनलाबी कोनी जाता नयी दिस्. ज्यान रामायन महाभारत देखनला गावको गाव जमा होय वा सपरी अज सुनी सुनी पळी रोवसे. जेव घर बेठारक् माणसयीनलक भरजाय वू घर आता बेठारक् लोकयीनकी बाठ देख देख झुर रयीसे.

टिवी यव एकच उदाहरण लेयीसत् येतरो बदल आपलोला दिसंसे. जमानोत् येकोबी केतरो तरी पुळ् निकल गयीसे. सब समयको फेरा बाकी कायी नयी...........गुलाब बिसेन (९४०४२३५१९१)