तुमरी - आमरी पोवारी बोली

तुमरी - आमरी पोवारी बोली

÷÷÷÷÷÷÷÷÷÷÷÷÷÷÷÷÷

कोणतीबी भाषा ओक् बोलीभाषाईनलक फलंफुलंसे. गावखेळामा बोलीजानेवाली गावठी भाषा अशुद्ध मानीजासे. पर खरी भाषाको जतन याच गावठी बोली करत रवसे. आपलो समाज जसजसो शिक्षण लेयशान शाहानो होय रयीसे , तसो काजकजान् पर आपल् बोलीपासून दूर दूर जाता दिससे. यव बदलाव आपलंच नयीत् दुसर् समाजमाबी कमी जास्त परमानमा दिससे. नवकरी धंदालक खेळामालक शयरमा बस्या लोक आपली बोली बोलनला सर्मासेत. आपल् बोलीमा बोलनो वूनला कमीपणाको लगसे. परदुसर् आंग् नागपूरसारक् उपराजधानीमा रयस्यानबी आपली पोवारी बोली फलावन फुलावनसाटी दिवसरात राबनारा हातबी सेती.

बोली कोणतीबी रव्हं , वोला आपलो इतिहास अना भूगोल रवंसे. पोवारी बोलीकोबी आपलो इतिहास अना भूगोल से. धारमा जल्मी पोवारी अलग अलग रूपमा विदर्भमा आपलो पाय गाळस्यान उबी से. आपलं पुरवजयीनन् बळ् मेहनतलक पोवारीला संभालस्यान ठेयीन. वोको पालनपोषण करीन. आता आपलो कर्तव्य बनसे का वोला संभालस्यान वोको मान संम्मान बढावनो. पर आबंकी परीस्थिती थोळी चिंताजनक से. 

सिखेवलिखेव आपलो समाज पोवारी बोलनला अना लिखन बाचनला तयार नयी होय रयीसे. येका बुहु कारण सेती. मानुसपुट कारण अलग सेती. बहुतसार् पोवार घरमा आआता पोवारीकी जिगा हिंदी अना मराठीन् लेयलेयीसेस. या मोठी चिंताकी बात से. पोवारी बोली या जनजनकी बोली रयस्यानबी आपलो समाज वोक् पासून दूर जानो दुखकी बात से.

"वसुधयवं कुटुंबकम" क् जमानोमा नवो पिढिला विरासतमा आपलो समाज का देणार से ? भाषा माणुसला माणूसंग् जोळस्यान ठेवनको काम करसे. मी जब् समोरवाल् संग पोवारी बोलन लगुसुत् वू मोरोसंग् हिंदी झाळंसे. तब् एक पोवारी बोलीभाषकक् नातोलक दूख होसे. राजा भोजकी संतान समजनेवालो वूनकी विरासत पुळ् लिजानला काहे घबरासेत ? माहीत नयी. आपली बोली येव एकच धागा आपण आपल् विरासतमा आपल् नव् पिढीला देय सक्यात् येकोसारको समाजसाठी मोठो काम  कोणतोच नयी होनको. जरूरत से आपल् पोवारीला तुमरी - आमरी पोवारी बनायस्यान ग्लोबल रूप देनकी. ....... गुलाब रमेश बिसेन , सितेपार (तिरोडा)