मोरी बाचन प्रेरणा - मोरा बाबुजी

 मोरी बाचन प्रेरणा - मोरा बाबुजी

बाचन येव माणूसला संस्कारीत करंसे. बाचनला मनको व्यसनबी कहे जासे. मोरो जनम सितेपारमा(ता. तिरोडा) भयेव. आमर् घर् मोरा अजी कबी स्याळामा नही गया पर संगीभायीनक् देखासिखीलक कामपूरतो लिखत अना बाचत. मायन् स्याळाको तोंडच नही देखीस. अस् घरमा आमरा बाबुजी दसवी सिक्या. आई सातवी पास. घरमा स्याळाक् किताबयीनक् बिगर दुसरी किताब् ढुंढस्यानबी मिलत नोहती.

गावमा वाचनालयत् सोळो पर साधो बाचनको पेपरबी नोहोतो आवत. असोमा आमर् बाबुजीला बाचनको छंद कहानलका लगेव मालूम नही, पर वूनला बाचनकी मोठी आवळ होती. वूनला जबबी कहीं किताब मिल् वय घळीभरमा बाचटाकत. पर घर् स्याळाकी सोळस्यान किताब् मिन् बचपनमा कभी नही देखेव. आजुबाजुला वाचनालयकी कमी रहेलक बाबुजीको बाचनप्रेम अपूर्णच रव्ह. मंग वय आमरी स्याळाकी किताब्, उनकंमाकी कविता, धडा बाचस्यान काहाळत.

पर थोळ् रोजमा वयबी बाजस्यान होय जात. मंग् आमरा बाबुजी किराणो सामानमा आयी पेपरमा बंधी सामानकी पुळी खोलस्यान वय चिटुरा बाचत. च्यार सय मयनामा आमर् गोंदियाक् मावशीघरलक आयी पेपरकी रद्दिपर बाबुजी टुट पळत.(मातीक् घरमा कपळा लटकावनक् खुटिजवर भितला पेपर लगायेलक भीतको भीस/चुनोलक कपळा नोहता भरत) अना खालीबेरा पेपरकी जुनी रद्दि बाचस्यान काहाळत.

बाबुजीको येव पुरो बाचनको आमी निरीक्षण करजं. उठता बसता बाबुजीको ध्यान कागजपरच रव्ह. (अजबी वाय परिस्थीती से. पर अज बाचनसाती आमर् बाबुजीजवर साजरी साजरी किताब् / दिवारी अंक सेती.) आमर् बाबुजुकी याच आदत मोला लगी. अना मी किताबयीनक् दुनियामा आयस्यान खुदला भाग्यशाली समजूसु.  मोर् बाबुजीकं बाचन प्रेमन् किताबयीनसारखो सच्चो दोस्तसंग् मिलनकी प्रेरणा देयीस. येकंसाती मी मोर् बाबीजीको उमरभर ऋणी रहून.

लेखक - गुलाब बिसेन, सितेपार, ता. तिरोडा, जि. गोंदिया ४४१९११