ऋण साहित्य गण को

 ऋण साहित्य गण को

४) डाॅ. प्रल्हादजी हरिणखेडे (प्रहरी)

डोंगरगाव गावका सुपुत्र प्राध्यापक डाॅ. प्रल्हादजी हरिणखेडे गावखेळामा सिकस्यान डाॅक्टरेट बननेवाला (phd) सर्वसाधारण घरका एक सर्वसाधारण परीस्थितीमा निपज्या एक हिरा कवनो लगे असो व्यक्तित्व. ग्रामिण भागमा सुविधाकं अभावमा माणूसकी काही अलग कर देखावनकी इच्छाच मर जासे. पर मनमा रातदिन मेहनत करनकी दृढ ईच्छा रही त् कोणतीच परिस्थिती प्रगतीमा आळवी नही आय सकं येको जितो जागतो उदाहरण मंजे आमरा प्रा. डाॅ. प्रल्हादजी हरिणखेडे. अज शासकीय अध्यापन क्षेत्रमा आपलो अलग ठसा उमटायस्यान साहित्य क्षेत्रमाबी आपली अलग छाप उमटाय रह्या सेत.

प्रा. डाॅ. प्रल्हादजी हरिणखेडे येव उच्च विद्या विभूषीत व्यक्तित्व येतरो सिधो साधो से का इनकंसंगं घळीभरमाच कोणीकीबी दोस्ती जम जाये. साधो रवनेवालो येव हिरा पोवारी साहित्यकं माध्यमलक सबला सुपरीचित भयेव. अध्यापन क्षेत्रकं संग संग डाॅ. प्रल्हादजी हरिणखेडे आपल् लेखुन प्रतिभालक पोवारी अना मराठी साहित्य समृद्ध कर रह्या सेत. प्रहरी नावलक लिखनेवाला डाॅ. प्रल्हादजी पोवारीमा अलग अलग काव्य प्रकारमा लेखन कर आपली अलग पहचान बनायीसेन.

शिक्षकी पेशाला सर्वोच्च पुरस्कार समजनेवाला डाॅ. प्रल्हाद हरिणखेडेजी राष्ट्रिय अना आंतरराष्ट्रिय परीसंवादयीनको सफल आयोजन करस्यान आपली नेतृत्व कलाबी देखायीसेन. अनेक परीसंवादमा भाय लेयस्यान आपलो संशोधन कार्य सबवरी पोवचायीसेन. अध्यापन, साहित्य अना संशोधनकं बराबर गिर्यारोहण, निसर्ग निरीक्षण, संगीत, हार्मोनिका, ढोलक वादन, गायन असा छंदकी जोपासना करनेवाला एक उच्च प्रतिभाका धनी डाॅ. प्रल्हादजी आपलं सबकं बीच सेत याच आपलंलायी भाग्यगी बात से.

पोवार समाजमा प्रतिभाकी कमी कहींच नहाय ना नोहती. आपलं समशेरलक युद्धभूमी गजबजाय टाकनेवाला पोवार अज खेतीकं बराबर उद्योग, व्यापार, कला, शिक्षण, आयटी, मेडिकल अना अन्य बहुतसारं क्षेत्रमा आपली कर्तबगारी देखायरह्या सेत. या कर्तबगारी देखावनकं बेरा आपली मायभूमी, आपलो समाज, आपली मायबोली इनकं सेवाको भाव मनमा ठेवनेवालो सुसंस्कत समाज बंधूईनमालक डाॅ. प्रल्हादजी एक सेती. उच्ची उडाण लेयकनबी पाय जमीनपर ठेवनेवालो उच्च संस्कारीत व्यक्तीत्व उनकं अंदर विराजमान से. आपलं समाजलायी जेतरो जमे वोतरो योगदान देनको भाव वूनमा सदा चोवसे. येवच भाव उनला अन्य लोकयीनमालक अलग करंसे.

माता सरस्वतीको आशिर्वाद मिलेव येव कवी, हाळाको शिक्षक, सुसंस्कारको धनी व्यक्ती पोवार समाजला सदा प्रेरणादायी से. उनकं प्रतिभालक मायबोली पोवारीको साहित्य क्षेत्र अधिक समृद्ध होये. वूनको शिक्षण, साहित्यक्षेत्रमाको योगदानको आलेख रोजकं रोज बढतो रहे असी माय गढकालीकाला मी प्रार्थना करूसु.

लेखन - गुलाब रमेश बिसेन
मु. सितेपार , ता. तिरोडा , जि. गोंदिया. 441911
मो. नं. 9404235191
ई मेल - gulab0506@gmail.com

३) पोवारीका धुरकोरी प्रा. डाॅ. शेखराम येळेकर*

सिंदीपारसारखो जंगलझाडीमा बसेव गाव सिंदीपार. येनं गावमाबी जानको बिचार मनमा अगर आयेव तं जान बुझके रस्ता धरनो लंगंसे. असो गावको साधारण घरको एक टुरा पी.एच.डी. होयस्यान नागपूर विद्यापीठमा प्राध्यापक पदवरी पोहंचसे. या उपलब्धी शिक्षाक् प्रती उनकी लगन अना मेहनतको प्रतिक से. प्रा.डाॅ. येळेकर ये आपल् मेहनतलक उच्च पदवरी पोवच्या अना गाव अना पोवार समाजका रोलमाॅडेल बन्या.

डाॅ. येळेकर सर येव व्यक्तिमत्व पानी सारखो से. पानीमा जेव रंग घोलो वू वोनं रंगको बन जासे. तसो साधो भोळो, मनमिळावू अना नहान टुरूपोटुपासून त् बुजरूकवरी सबमा मिसरनेवालो वूनको स्वभाव ऊनला आम आदमीपासून अलग करंसे. वय बुजरूकमा गयात् बुजरूक अना टुरूपोटुमा गयात् टुरूपोटु बन जासेत. येळेकर सर आपलं नोकरी निमित्त नागपूरला जरी स्थायिक भया पर वूनको अर्धो जीव सिंदीपारमा बसी से. बेरा बेरापर गावमा जायस्यान गावकं युवावर्गला मार्गदर्शन करनो वूनको स्वभावच बन गयी से. समाजमा बहुतसारा लिख्यापळ्या शहरमा गया अना शहरकाच भय गया. पर येळेकर गुरूजीन्  गाव संगकी अापली नार टुटन न देता वोला मजबूत करी से.

गुरूजी जसा विद्याका उपासक सेत तसाच वय मायबोली पोवारीका वारकरीबी सेत. एक आंगं उच्च शिक्षीत समाज मायबोली पासून दूर जाता दिससे त् दुसरं आंगं येळेकर गुरूजी सरीको प्राध्यापक मायबोली पोवारीको धुरकोरी बन बोलीको गुडूर हकालनमा धन्यता मान रही से. येव उनको मायबोली पोवारीप्रतीको प्रेम वय आपलं बोलचालमालक सदा व्यक्त करंसेत. गुरूजी संगं कबंबी बात करो, वूनकं मुखमालख साक्षात सरस्वती बोल रही से असो भास बोलनेवालोला होयस्यान वूनकं प्रती लगाव होय जासे. असो मायबोली पोवारीको भक्त आमरंमा से. या बहुतही भाग्यकी बात से.

डाॅ. येळेकर प्राध्यापक मुहुन विद्यार्थी प्रियत् सेतच पर संशोधन क्षेत्रमाबी उनको कार्य प्रेरणादायी से. वूनकी अध्यापन शास्रमाकी दुय किताबं आबंवरी प्रकाशित भयी सेती. संशोधन येतरोच वूनको साहित्यपरबी प्रेम से. येनंच साहित्यकं प्रेम खातर वूननं "जिवनाच्या वाटेवर" येव मराठीमा कविता संग्रह प्रकाशित करीसेन. मायबोली पोवारीमा वूनका लिख्या भाऊड सबला भूलायदेसेत. वूनकं शब्दकी ताकद वूनकं पोवारी, मराठी कवितामालक दिसंसे. पोवारी बोलीपरकी उनकी पकळ अलग उचाई परकी प्रतित होसे. आपलं अलग ढंगलका येळेकर गुरूजीनं पोवारी साहित्य क्षेत्रमा आपली अलग मोहर ऊठायीसेन.

<<<<------ गुलाब बिसेन, सितेपार (दि.२७/०५/२०२१)

२) चिरंजीवजी बिसेन

पोवारी साहित्य जगत साहित्यपटलपर आवनक् येन् संक्रमन कालमा जसा नवोदित साहित्यिक आपलो लेखनला निखार रह्या सेत, तसोच ज्येष्ठ साहित्यिकबी आपल् अनुभवको साहित्य क्षेत्रमा कस लगायस्यान पोवारी साहित्य निर्मीती कर रह्या सेत. असाच एक खासकरस्यान पोवारी साहित्य जगतका ऋषीतुल्य साहित्यिक मंजे कवी चिरंजीवजी बिसेन ये आत.

चिरंजीवजी बिसेन येव शिक्षण क्षेत्रमा नवाजेव नाव. अध्यापक पासून सुरू भयेव येव प्रवास केंद्र प्रमुखपर आयस्यान रूकेव. शिक्षण क्षेत्र नवनवा प्रयोग करस्यान गोंदिया जिल्हाक् शिक्षण क्षेत्रमा आपलो अलग पहचान बनावनेवाला चिरंजीव बिसेनजी अनेक पुरस्कारयीनका मानकरी ठर्‍या. माणूस आपल् उमरलक निवृत्त होसे पर वोन् मनलक निवृत्त नही होये पायजे. येवच सूत्र पालन कर बिसेनजी अज साहित्य क्षेत्रमा कार्यरत सेत.

एक क्षेत्र सूटेपर दुसरो क्षेत्रमा आपली अलग पहचान उनन् बनाईसेन. पोवारीक् संगसंग मराठी अना हिंदी साहित्य क्षेत्रमा बिसेनजीकी उठबस से. मराठी, हिंदी साहित्य सृजन करस्यान उनन् क्रमांक प्राप्त करीसेन अना कर रह्या सेती. अलग अलग भाषामा साहित्य सर्जन करनो तसो तारपर कसरत करनोलाईकच से. पर मन मा उमंग रहेव अना मूलत: सर्जनसिल व्यक्तिमत्वको धनी आदमी आपली छाप सोळच देसे. असा चिरंजीवजी बिसेन साहित्य क्षेत्रमा कार्यरत सेती.

चिरंजीवजी जसा पोवारी, मराठी अना हिंदी कविता लिखसेत तसोच उनको अनुवादबी दर्जेदार रव्हसे. अनुवाद कलाको परीचय वय समय समयपरा देता रवसेत. अॅड. लखनसिंह कटरेजीकं मराठी कविताको "असोत् बिलकुल नहाय" येव पोवारी अनुवाद जबरदस्तच कहे पायजे. असा ये साहित्यिक पोवारी साहित्य क्षेत्रमा कार्यरत सेती या आमरंसाती गर्वकी बात से.

- गुलाब बिसेन (दि.१३/०५/२०२१)

१) अॅड.लखनसिंह कटरे

ज्येष्ठ साहित्यिक अॅड. लखनसिंह कटरे मंजे मराठी, पोवारी, झाडीबोली, हिंदी साहित्य क्षेत्रका अजातशत्रू व्यक्तिमत्व. येनं व्यक्तिमत्वनं आपलं प्रतिभाकं जोरपर साहित्य क्षेत्रमा आपलो खुदकी असी एक अलग पहचान बनायीसेन. आपलं निजी जीवनमा एकपर एक संकट झेलस्यानबी अज पहाळ सरीको अडिग रवनेवालो साहित्यीक आपलं पोवार समाजसाती भूषण सेती.

अॅड. लखनसिंह कटरेजी इनकी कविता लिखनकं शैलीका साहित्य क्षेत्रमा अनगीनत दिवाना सेती. उनकी कविता हर बाचकला खुदको अर्थ देनको स्वातंत्र्य देसेती. बाचक आपलं क्षमता अनुसार कविताको अर्थ हेळसे. येनं कारणलका उनकी एकच कविता हर बाचककं अंगलका अलग अलग अर्थानुवर्ती होसे.

आ. कटरेजी मराठी साहित्य जगतमा एक आदरणीय साहित्यिक सेती. वय जसा मराठीमा रमसेत. तसाच वय हिंदीमाबी मूक्त विहार करंसेती. झाडीबोलीकं संगच मायबोली पोवारीको उनला अधिकच लळा लगीसे. उनकं मार्गदर्शनमा अज साहित्यिक प्रेरणा लेयस्यान पोवारी साहित्यकं सृजनमा लग्या सेती. झाडीबोली साहित्य संमेलनका अध्यक्षपद, झाडीबोली साहित्य संमेलनको यशस्वी आयोजन, पोवारी साहित्य संमेलनको आयोजन असो संघटनात्मकं उनकं कार्यकी अलग छाप पळी से. उनकं हातलका साहित्यको सर्जन असोच होत रहो या मनोकामना......गुलाब बिसेन