नातो - सारी भाटवाको

नातो...... सारी भाटवाको
::::::::::::::::::::::::::::::::::::

" सारी अर्धी घरवाली " असो कयी जमानोपासून कयेजासे. पर सारीला घरवाली करनेवाला हिम्मतबहाद्दर तसा कमच ! सारी भाटवाको नातो एवळोच मर्यादित से असो नयी. यकंपेक्षा अलग नातो से सारी - भाटवाको. यन् नातोकी सुरूवात भाटवा जबं टुरी देखन आपलं सुसरो घरं जासे तबं खिळकिमालक लुकाय लुकाय देख टुरा कसोक से एकि खबर लायनांगं पोहचावनको कामलका होसे. मंग बियामा भाटवाका जुत्ता लुकायशान भाटवाला सारीच लुटसे. पर यव लुटनो आपलं परंपराको एक हिस्सा समजशान सारीकनलक जुत्ता लुकाये जासेत.

सारी भाटवाको यव रिस्ता होरिमा चांगलोच बहरसे. जिजाजीला रंगलका रंगावनको काम सारी बखुबी निभावसे. यन् रिस्ताला बाहेरकं दुनियामा बढाय चढायकर , चटणी मीठ लगायशान रंगायव जासे. पर यव रिस्ता जेतरो हासी मज्याकलक भरेव से वोतरोच जवाबदारीकोबी से.. सारीक् बियामा मांडोला तोरण बांधनो , सुसरंक् गावक् देवयीनला हरदि चढावनोपासून त् नवदेवपर रंग झोकनोवरिको काम यव भाटवाच जबाबदारीलक करसे. सारीको बिया भाटवा बिगर होय नयी सक् येव वोतरोच खरो से.

बाहेरकं दुनियामा सारी भाटवाको नातो जेतरो रंगायव जासे वोकंपेक्षा यव पवित्र नातो से. बिया होयेपर बहिनकी खरी काळजी लाहान बहिन लेसे. आपलं बहिन भाटवापर कायी संकट आयव तं या सारी उनकं मदतला तयार रवसे. बहिन इमार - बिमार पळि तं बहिनकी फिकर करन लायनं बहिनला पटाये जासे. बहिन बारतीन भयेपरा लाहान टुरू पोटुयीनला खेलावनको काम सारीच चांगलोलक करसे. पर आता शिक्षणक् जमानोमा पयले येतरो रिकामपर सारींलाबी नाहाय. पर मनुन कायी सारी भाटवाक् रिस्तामाको गोळवा कमी भयव असो नयी. आधुनिक समाजक् जुन् नव् परंपराकबीचमा यव रिस्ता पयले येतरोच आबनबी आपलो स्थान बनायेव से........... गुलाब बिसेन (९४०४२३५१९१)