घुगरी

##  घुगरी  ##

घुगरी...... यव तिन अक्षरको शब्द तोंडमालक लेनकंघनी शब्द जसो बायेर पळंसे तसो ओकंसंगच तोंडला पाणी सुटनो चालु होसे. कायेका येनं घुगरीकी चवच मोटि न्यारी से. पोपटकि घुगरी असी तोंडमा धरिसका वोकी चव तोंडमा घुमतच रवसे. आपलं पोवार समाजमा घुगरीकि परंपरा मोळि पुरानी से. यनं घुगरीको संबंध आपलं पुरवजयीननं आपलं रोजमर्राकं जिनगी संग अना आपलं धार्मिक विधिसंग जोळनको कारण मला घुगरीनकी जिभलाबी नाचावनेवाली चवच रये असो मोला लगंसे.

पराकं घातं रोवणा सरणकं दिवस बांधिपर परा बळावनकी घाई चली रवसे से. पेंडकर , खारखोद्या , चिखल करनेवालो नांगर्‍या अना रोवना लगावनेवाली रोजदारं परा सरनकं खुसिलका पटपट रोवणा लगावसेत त् उत् घरमा पटलिन घुगरी रांधनकी तयारी एक दिवस पयलेपासूनच करस्यान ठेवसे. पटलिनकं हातकी गहु अना चनाकी घुगरी बांधिपरकं सपा मजुर अना रोजदारयीनसंगं रातवा सहभोजन करशान आनंदलक खाये जासे. गहुकि घुगरी परामा सोळिसतं बाकिघन् कोनी खाता नयी दिसं. ओकलकच गहुकं घुगरीकि याद आवत रवसे.

घुगरी खानकोच भयवतं चनाकी घुगरी घरगर खाये जासे पर पोपटकं घुगरीनं आपलं समाजमनपर असो कायी मोहनी डाकिसेस का यकं बिगर आमरो घरको वास्तुक अना टुरा , टुरिको बिया होयच नयी सकं. बियामा पोपटकि घुगरी अना पेज नयी देयीसतं वोनं पोवारकी किर्ती पुरो गावभर फयल जासे. बियामा नविन बियाभयव नवरा नवरीकं हातलका घुगरी वाळनकी परंपरा आपलं समाजमा से. बियासारको पवित्र विधिमा पोपटकं घुगरीको एवळो महत्ब दुसरं कोनतं पदार्थला रये असो मोला नयी लगं.

ज्या बात बिया कि वाच वास्तुक कि. वास्तुक घरको रवो नयीत् बिहिरको रवो , घुगरी सिवाय यव विधि पुरो नयी होय. समाज जसो आधुनिक बन रयी से तसो कायी परंपरा मंग पळ रयीसेत. पर दुनिया केतरिकबी बदल जाय..... आमरं पोवारयीनकं जिबपरलक घुगरीकि चव कबिच नयी उतर सक् ...........

श्री. गुलाब रमेश बिसेन (9404235191)