पोवारी पत्र - १

 पोवारी पत्र - १

विषय - सीमापर को सैनिक को आपल घरको सदस्य इनला पत्र

                                             अंकित बिसेन
                                           ७०४ , south RR , लडाख
                                               दि. २६/०८/२०२०

तिर्थरूप ,
           आई - बाबुजीला साष्टांग वंदन

                        आई बाबुजी तुमरो पत्र गये हप्तामाच मालेव. पत्र बाचस्यान बहुत खुशी भयी. आपल् खेतीको धान साजरो से. गावमा गणपतीकी तयारी चालु से अना पोराला कोरोनाक् भेवलक घरमाच जोळी पूजस्यान साजरो भयेव. या खबर मोला पत्रमालकच समजी. आब् चीन अना भारत देशक् बिचमा निर्माण तणाव तुमी टिवीपर देखतच रवो. टिवीपरकी बातनी देखस्यान घबरानकी काहीच जरूरत नाहाय. मोरी डिवटी साजरी चल रही से. असो तणावत् घर परीवारमाबी होतच रवसे. तसोच येला समजो.

                       यंदा कोरोनाक् कारणलक इतबी आमी खबरदारी लेयच रया सेज्. तुमीबी वूत् खबरदारी लेव. आयी रोवणा भयेव. आता आराम कर. रोवणामा तोला चयीन नही पळ्. आपल् तब्बेतकी काळजी ले. आपली दवाई बेरा बेरापर खात जाय. बाबुजी तुमी सकारी सकारी खेतकनलक फिरस्यान आवत जाव. अना दुकानपर नहीत् बजारमा जानो भयेवत् चेहरापर मास्क जरूर लगावो.

                      आमी सबजन इत् सुखो सुवारो सेज्. कविता अना पिंटुबी साजरो से. तुमरी याद करत रवसे. दिवारीमा सुट्टीपर आवून. कॅटिनमालक काही सामान लगत रयेत् पत्र पठायस्यान सांगो. बाबुजी तुमी कमी बोलंसेव. आपली तकलीफ नही सांगो कोणीलाच ! तब्बेत संभालस्यानच काम करत जाव. आता थांबुसु.  पिंटु कनलक तुमला गोळगोळ पप्पी !
                                     
                                                  तुमरोच
                                                  अंकित